inig gradweyt nakos hayskol

Talianak
Na usab si Nanay.
Napulo nay myembro
Sa among banay,
Lupig pang madyikero
Sa akong tatay
Nga dayag gyod
Ang pagtuo
Sa karaan nga sugo kuno
Sa Ginoo pagpadaghan
Sa mga tawo.
Wala siguro ang kahitas-an
Kahibalo nga naghuot
Na mi sa among baryo--
Kon mosuol ang tiyan
Sa among kamanghoran.
Kon manukot
Ang among giutangan
Modagan ko sa silingan
Sa kaulaw niining tanan.
Sige lang,
Inig tungtong nako
Sa hayskol
Dili na gyud ko magguol
Kay matod pas akong
Suod nga higala
Inig-gradweyt namong duha
Mokagiw mi sa syudad
Manarbaho bisag unsa
Aron naa koy mapadala
Sa dugay nang
Gisapot nga tindera.


-- MARIA VICTORIA BELTRAN
Cebu City, Philippines