metamorposis sa kabalaka

Mangitlog sa bagulbagol
sa dapit nga dili matultol.
Gil-as sama’s til-as moligdas
sa abaga nga manghalang
usahay sa panglantaw ilabi
na og patuyangan pagkilkil
ang bahin diin maoy ikaangin
sa pamasin. Pero’g huwaton
ang pagkaalim sa hapdos, dili
mamatikdan ang kanahan tua
nilabyog sa unahan, nalimin
sa usa ka kahibulongang putos
sa kahigwaos, hangtod sa dili
pinugos niyang kahigayonan
molugwa ra ang mabulokong
kabakaba sa tipaka sa wala.


-- NOEL D. RAMA
Clinton, Maryland, USA