sa mga hugawng' anghel

Wala mo kaila
Sa kangitngit.
Wala moy tumong
Sa pagpamupo og
Mga bituon.

Ang inyong gagmay'ng tingog
Dili dugdog nga lanog
Lupig ang busina sa mga sakyanan,
Ang siyagit sa mga konduktor ug dispatser,
Ang bahakhak sa manag-uyab,
Ang dug-ab sa hubog,
Ang sid-ok sa busog nga tambok,
Ang sermon sa pari
Nga mikagiw gawas
Sa koral sa Katedral.

Nasayod ko: ang inyong gagmay'ng tingog
Igo lang nagsibya, nagbaligya og

tag-piso'ng kandila
Sa kaluwasan.

Inyoha na lang unta na,

hupta'g hugot ug tipigan.


- KEVIN A. LAGUNDA
Mandaue City, Philippines