yuhotpamati

Kadto rang dalunggan nga gibuksan, matod pa ni Rumi, maoy makabati
Sa tiyabaw sa usa ka langgam nga nagagikan sa napulo ka libo ka mga milyas.
Apan unsaon ta man pagpamati kadtong way mga tingog?

Ang rosa dunay mga pulong nga sama kadaghan sa iyang mga gihay, apan maoy
Atong gipalabi ang iyang kahumot. Kon ang mga dagkung bato mahimo pang
Pukawon gikan sa kasigloan nilang paghikatulog, tingali baya og sila motug-an

Kon unsa ang ilang mga gidamgo. Wa ta hidunggi kon unsa ang gisinggit
Sa walog ngadto sa langit. Kon unsa ang mga tinagoan nga gitug-an
Sa mga bituon ngadto sa gabii. Wa ta hisayri kon unsay gitipigan sa gabon

Sa luyo sa iyang gapasong bronda. Tingali og ang chameleon dunay buot
Isulti sa iyang kanunayng pag-ilis og mga bulok. Tingali og dunay mensahi
Nga nahisulat niadtong panit nga gibilin sa halas sa iyang pagpanghulo.

Tinuod nga ang buta’ng makililimos wa makakita sa kaanindot sa Granada.
Apan, unsa uroy atong kahibalo, kon unsay mga gihunghong sa mabulokong
Mga bungbong sa Alhambra ngadto sa iyang dalunggan? Dili kita apil

Sa panagkabildo sa mga langgam ug sa kabulakan sa matag buntag
Sa tingpagpamulak. Apan paminaw. Kay tingali og dunay atong hikat-onan.
Bisag mao ray atong mahimo kining ginagmay tang mga yuhotpamati.

__________________________________________________________

Nota: Ang pulong yuhotpamati (eavesdropping) gimugna ni Dr. Mel Allego, ang bantogang magbabalak, nga higaladagang ning tagsulat.

-- URIAS A. ALMAGRO, M.D.

New Berlin, Wisconsin, USA