ang gikinahanglan nga kahilom

"Wovon man nicht sprechen kann, darüber muß man schweigen."
--Ludwig Wittgenstein

















Sa sunod natong panagkita,
motimbaya ko nimo,
nga morag wa ray nahitabo.
Hayan sama sa naandan
dako kaayo kog tingog.
Mohisgot ko unsa kalalim
ang balak, unsa katam-is
ang pinulongang Sugboanon.
Apilan tingali nakog
gamayng komentaryo kabahin
sa Beijing Olympics.
Apan sulod sa halwa sa akong
kasingkasing, magyapayapa
ang akong kahilom nga

magtan-aw maminaw mohikap mosimhot motilap

sa imong kamabihagon.


-- VICENTE VIVENCIO BANDILLO
Dubai, United Arab Emirates