dili angayng kabalak-an

Nasayran ang kaugmaon
Kanunay gadasdas, ang takna
Ga-atras, paduol, paingon
Sa iyang lubnganan. Gani,
Way lawom nga panahom
Ang makaluwas o ba kaha
Makakita sa patay niyang
Lawas. Ug nahibaw-an na
Sa kadaghanan, ang ugma
Nag-ungaw pod sa hulga
Matag gutgot sa mga gutlo.
Kanunay og pitik ang takna,
Apan molahos ra ang pulso
Ngadto ra sa pagkapadlos.
Ug padayon nga magdugo
Ang alimpatakan. Samdan.
Magdugo. Way pagtang-on
Ang sugwak sa hunahuna
tutok sa kahadlok tungod
Sa pagtuok sa kagahapon.
Ug way usa nga makaingon
Sa hinungdan; makatarunganon
Ba, mahinugon pagkakaron?

-- NOEL D. RAMA

Clinton, Maryland, USA