mga tuwapos sa kilumkilom

wala silay laing gipangandoy
kon dili ang imong pagduaw lamang
gani dili man kuno kinahanglan
nga magdala ka pag mga gasa
ang ila nga tua ka uban kanila
nga makita ka lang nila
bisan sulod sa pipila lang ka takna
wala kay angayng kabalak-an
dili gani sila mohangyo
nga kumustahon mo silag tagsatagsa
mopahiluna ka lang
sa nataran diin sila magdudakpanay
sila moalirong kanimo
ug kaha usahay mopasiklap kanimo
tugob sa pinugngan nga kahinam
sila malingaw rag ila
dili ka nila samokon
mahitabo hinoon tingali usahay
nga ang ilang hangos ug gininhawa
modaplos sa imong tingkoy
ang ilang mga kulisiw motala
og nagsagayad nga dalandalan sa hangin
daw ikog sa sapisapi
nga mahimo nimong signiton
labnoton ug gisigision
kon kanus-a nimo gusto
niining nagkaupos nga kahaponon
diin wala silay laing mapaabot
gawas sa dili-matukib nga kasakit

nga idulot sa imong pagbiya

-- VICENTE VIVENCIO BANDILLO

Dubai, United Arab Emirates