ang nasod sa usa ka o.f.w.

Naa sa sulod sa iyang backpack
Nga gisudlan sa probinsiya sa iyang mga kahingawa
Diin nahimutang ang lungsod sa mga sakripisyo
Taliwala sa Pasil sa iyang mga damgo
Nahimutang ang iyang panimalay sa mga hulagway
Diin nanambo ang mga mata
Sa iyang kamaguwangang’ ulitawo gikan sa Munti
Human lubaa ang kabit sa iyang kapikas
Diin usab nanukad ang nanulisok nga mga bakho
Sa iyang ikaduhang bayung-bayong
Nga nagumon sa aso sa bato
Alang lumsan sa kemikal ang kamingaw sa iyang pagpangga
Diin hilom ang lawak sa iyang kamanghoran
Nga karon bantogang burikat sa Junquera.
Ang nasod sa OFW naa su’d sa backpack.


-- LEO BOB FLORES
Bukit Batok, Singapore