ang pit-os nga dalan

Nilahos og tuyhakaw ang kahayag
taliwala sa langit ug kanawkanaw,
nihikyad sa adlaw nga nahimong
tukod sa unos sa panahong mahagiton
ug nisala sa utlanan
sa lamukat nga balatian.

Ang pluma nitangtang
sa hiniktang’ pulong
nga lihay sa kamatuoran.
Nagtyabaw ang kahilom ngadto sa hangin!
Sama sa espongha, misupsop sa kasakit.

Ang kinaadman ba molihok
kon ang panghunahuna binilanggo?
Puga-a ang hangin! Luwasa
ang napatik sa alimpatakan

alang sa kagawasan--
ang walay pagkupas
nga mga bulok sa bangaw.


-- CANDICE SALAZAR
Calgary, Alberta, Canada