nganong dili maayo ning magbinugtong tag inom-inom

Dihay baboy nga misulod sa restawran diin
nag-inom-inom kong nag-inusara. Natarantar ko
kay pinakupsan ra bay akong sumsom.
Nahuwasan hinuon ko dayon kay baboy
man sab ang iyang gi-order. Crispy pata.
Wa man lang matingala ang uban. Gani,
mora man siyag regular customer didto.
Siya rang usa, pero paskang daliang
nahurot sa iyang gikaon. Kitkit bukog gyod.
Pero ang akong kakurat napulihan og
kalagot. Wa man untay kaso nako
nga kanibal siyang pagkababoy.
Ang nakapasurok sa akong dugo kay dili beer
ang iyang giinom. Nag-Coke ang animal.


-- VICENTE VIVENCIO BANDILLO
Dubai, United Arab Emirates