pag-angkon sa kagabhion

Abi nako og gipanag-iya na nako
ang kagabhion ug balas sa baybayon.
Kay giihap na nako ang maabiabihon
sa kangitngit nga mga bitoon
ug ang hangin, kahilom og kahayag
nga mihalok sa akong aping.
Kadtong gisapwang nimo
ang nagladlad sa kamatuoran.

Kadtong gustong molakang sa atong tunob

sa balas nga sa dili madugay mapapas.

Moangkon kadiyot sa takna nga matag

karon ug unya atong balikbalikan bisan
sa hangin lamang. Kay tinuod
kini nanglabay lang, apan
dili kini maangkon sa uban.
Kining kagabhioon ubos sa bitoon
Didto sa ngitngit nga baybayon
diin ang hangin parat,
naghagawhaw ang kahilom
og naminaw ang kahayag. Samtang
gihagkan ang akong aping, ang imong kamot

gakumkom sa kagabhion nga akong giangkon.


-- MARIA VICTORIA BELTRAN
Cebu City, Philippines