usa ka hapon sa Biyernes, ika-13, sa st 13 jurong east, singapura*

Nagpangusmo
Ang hangin nga nisakpag bali-bali sa yuta
Nangalarot
Ang mga kahoy
Nangalunod
Ang mga sakayan sa dagat
Sama sa gipapuok nga tiki*
Nabuak-buak ang panagway
Sa itom ug basa nga langit
Nagnganga ang gutom ug uhaw
Sa unod nga yuta
Nilupad ang kagaw
Nga sama sa adunay hait nga tango sa Naga* gikan sa kahiladman sa kasakit
Nilupad
Hinabulan sa urot nga kangitngit
Nibundak
Ang dagkong lusok sa kapait
Nanuyhakaw ang mga uhong sa kahibulong
Pagkahuman sa makabungog nga siyaok sa budyong
Nagkutaw
Ang lawod sa bangis nga mga balod
Nga maningil sa bayad sa giutang nga balaang salaod
Sa mga bulawag buhok
Dugo ang bulok sa nisiwil nga kapungot
Nikilab ang sinaw nga pito ka mga ngipon sa kilat
Ug nilanog ang dakong libak sa libat nga mga itoy
Nga gikinilog baligya sa dakog tino nga siyukoy*.

________________________________________
Jurong: sa karaang Bahasa ang buot pasabot iho.
Iho : sa Bahasa og Cebuano buot pasabot pating.
Tiki : gibali nga kiit
Kiit : karaang Cebuano sa pakighilawas
Singa : Tamil og Bahasa nga buot pasabot lion.
Pura : karaang Bahasa nga buot pasabot mini o peke o pseudo.
Siyukoy : simbolo sa lion og isda nga buot pasabot samting pisi o naay nanimahong isda.
Naga : sa Bahasa og Cebuano bout pasabot dragon.
________________________________________

-- LEO BOB FLORES
Bukit Batok, Singapore