aktibista sa portiko

Dili na siya kabati sa kabugnaw sa semento
Nga gapanuhik sa iyang tiil.
Naputos na kini og kubal,
Sa kanunayng pagbagdoy-bagdoy sa dalan
Nga mora'g wala'y kapadulngan ni kahumanan;
Dili na gani siya kadungog sa uwan,
Nga nagbuto-buto sa sin nga atop.
Nabungol na siya’g pinaminaw sa iyang tingog
Nga siya ra'y nakadungog.
Nilubad na pod ang puwa sa iyang aping
Nga kanunay lang mahumod.
Ang maso ug sanggot nga kaniadto
Giwarawara niya sa kadalanan
Iya nalang gipabitay, mora’g kurtina nga
Mokurog, molabyog
Bisan sa labing hinay nga taghoy sa hangin.

-- BAL MARSIUS L. VALDEHUEZA

Cebu City, Philippines