basura sa sanciangko

Ako sab nga gikaguol
ang gidangatan sa mga upos nga sigarilyo
nga nagpasad
sa daplin sa kanal sa Sanciangko,
ang makaluluoy nilang kahimtang
dili na matabang,
tipon sa mga buslot ug bulingit nga plastik,
putos sa ice water ug mani
nga dili na makasulod sa langit,
gisindol sa hangin, wa mahakgom
sa trak sa basura
nga milabay kagabii.
O ang kamingaw
nga mibilikis sa mga way palad
nga mga buak nga botelya sa serbesa nanagbuy-od
tipon sa mga masulob-ong panit sa saging
diin gihimugso
ang panaghinigugmaay sa langaw!
Ang mga alaot
nga lata sa sardinas nga nangyuk-ong
ibabaw sa hut-ong
sa mga karaang momho ug bagal sa itlog
atbang sa dakong tindahan sa Insek
misugat sa umog nga mga mata sa kabuntagon,
ug ang matag tunob
sa tinguha nga mosangpot,
ug ang matag lusok sa luha nga mapukan
punsisokan sa mga hulmigas.

-- RENE ESTELLA AMPER
Boljoon, Cebu, Philippines
________________________________________________________
Kining balaka usa sa mga balak sa koleksyon ni anhing Dr. Rene Estella Amper nga ang ulohan Payag Ibabaw Sa Hangin. Gihatagan ni Rene og kopya sa orihinal ang iyang suod nga higala nga si Urias A. Almagro. Uban sa dakung pagbulig sa tigdumala niining balayan sa Kabisdak, ikasabwag na gyod kini ngadto sa mga magbabasa sa mga balak sa pinulongang Binisaya.