hagawhaw

(yukbo kang Yves Bonnefoy)

Paminawa akong mabanhaw dinhi
sa lasang, ilawom sa landong
sa mga dahon sa panumdoman,
diin nahilabay ako, nga lunhaw pa,
sa napagbang pahiyom sa gungis
nga mga tanom sa kalibotan, inubanan
sa naagiw nga dugo sa kabuntagon.

Paminawa ang akong pagkabanhaw,
ako nga motultol kanimo sa dalan
nga mohatod kanato paingon sa siot
nga tanaman sa kahimatngon, awaaw
inigkunsad sa kagabhion, tinaptapan
sa mga anino, way timik diin mogitib
ang tumos sa gugmang takulahaw.

Kagahapon, samtang naghari pa
ang kamingawan, ako ang ihalas
nga dahon nga mopanawng gawasnon—
apan hinog na ang panahon, naglugitom
ang mga daghong sa kawalogan,
samaran ang tubig nga nagkumkom
sa sidlak nga mga bato sa kabuntagon.


-- VICENTE VIVENCIO BANDILLO
Dubai, United Arab Emirates