nagbagang kahoy

Tan-awa ra god ang kahoy
nga nagdilaab sa kalayo.
Ang iyang mga sanga buot
mokab-ot sa hagtik nga kainit.

Matag tuig, nanganak siya
og mga dahon, sanga, bulak--

Mga dahon nga lunhaw,
lawas niini nagsapnay
sa gakamang nga kinabuhi
sa mga kabakaba.

Mga sanga nga nituyhakaw
Ug nindot kapyotan,
bitayan ug tugpahanan
sa kalanggaman.

Mga bulak nga pula kansang
mga aping gihagkan sa buyog.

Tan-awa ang kahoy karon
kay ang iyang kalayo unya
buboan og tubig sa mga tawo
nga dunay ibaligya kaninyo.


-- MARIA VICTORIA BELTRAN
Cebu City, Philippines