pipila ka mga tawo gusto sa pagpamalak

(gikan sa balak ni Wislawa Szymborska)

Pipila ka mga tawo –
sa ato pa dili tanan.
Dili gani ang kadaghanan, dyutay ra gyod kaayo.
Kon di iphon ang mga tua sa eskuylahan, diin kini gikinahanglan,
ug ang mga magbabalak mismo,
tingali’g makaabot ka og ingon og duha sa kada libo.

Gusto –
apan gusto mo man usab ang tinanghonang sabaw nga manok.*
O ang mga komplimento, o ang bulok nga asul,
ang daan mong bandana,
ang pagprobar sa imong punto,
ang paghapohap sa iro.

Pagpamalak –
apan unsa man gyu’ng matanga sa butang kining pagpamalak?
Mas daghan kay sa usa ka tay-ugong mga tubag
ang nahisukamod gikan pa sa unang higayon nga kini gipangutana.
Apan wa ko kini hisayri ug wa ko hisayri ug mokapyot ako niini
nga ingon sa usa ka lumoluwas nga ambayan.

_____________________________________________
* tinanghonang sabaw nga manok: chicken noodle soup

Gihubad ni:
-- URIAS A. ALMAGRO
New Berlin, Wisconsin, USA