sa korte kriminal

(hubad sa Iningles ni Charles Simic)

Pinahimutang ang imong pagpanudlay,
Talahuron, ginamit ang sudlay nga gagmayg ngipon
Nga praktisado kaayo nimong gidalidalig tago
Sa dayon nimong tim-aw, abaga hinaklapan
Sa halangdong kasilak sa kapa mong itom.

Ang sudlay nahisuksok sa pinil-an sa panyo
Nga nangalimyon sa kahumot sa patayng mga rosas.
Samtang nagpahiluna ka sa habog mong lingkoranan
Misarap ang hait mong tinan-awan sa mga sinumbong,
Tagsatagsa, dinhi sa way timik nga lawak-hukmanan.

Ang itom ug kulot nga buhok sa imong sudlay
Dili gikan sa nagsinaw mong bagolbagol.
Gigamit kini sa usa sa mga babayeng manlimpyohay
Samtang nahitagpilaw ka sulod sa imong opisina,
Gihubo ang sapatos ug nanlulho tungod sa kaigang.

Itom nga sudlay sulod sa bulsa ibabaw sa kasingkasing,
Hibatyagan mo kining mokurog sama usab
Sa among mga sudlay nga nangandam pagtugtog—
Ang kulang mao na lang ang papel nga, hayan,
Nagpiyong ka samtang imo ning gipirmahan.


-- VICENTE VIVENCIO BANDILLO
Dubai, United Arab Emirates