amnesya

I

Buot kong mahinumdom. Apan... Kangiob ang
mipuling sa mga mata ning alimpatakan.
Nagapangapkap king mga gamot ning yagaw
nga hunahuna. Nagapangitlib. Nahimong
ulipon sa mahugpaong kadulom...

II

Masupilon gayod ang kangitngit. Daw mga
aso nga milupog ning kalimutaw. Migupok
ning lubasang mga ugat sa Panumdoman.
Sa larawan. Sa handurawan. Sa dibuho
ning mapintalong tanlag...

III

Mahinumdom na unta ako. Apan... Sa taob
na unta king hunas. Sa panting na unta
king paggambalay. Sa kalit... Gisakmit sa
bakunawang kangitngit. Nagdagtom. Daw
mga dag-om. Mga abo nga misap-ong ning
nagapangamayng hinuktok...

IV

Mipuga ang pako sa Panumdoman. Bantok
na king Utok. Pansil. Giiway ko na lang
ang hikap sa kalimot. Mibanos dayon ang
Kahibulongang hakop sa kangitngit. Kaha,
ang kalimot mao ang kangitngit. Ang
kangitngit mao ang kalimot nga mikumot
ning utokan sa hinumdoman ko na unta.
Kinsa?...

-- MELQUIADITO M. ALLEGO
Palm Harbor, Florida, USA