unsaon paghikalimot kanimo?

Unsaon,
Nga ang mga dahon sa bombil nga mikatay
Sa pergola daplin ning bintana
Nagapanawag man sa bulak mong bansagon
Sa matag huros sa hangin, sa matag huros...
Ug takpan ko king lawak
Ning ermitanyo kong kalibotan.

Apan, ang larawan sa album sa katuigan
Nga giagup-opan na sulod ning kaban
Molakdop man ning sentimental
Nga hunahuna--- sahi sa handurawang
Masungogon:
Unsaon ko paggisi-gisi sa imong pahiyom?

Ug ang mga tudling sa gibalikbalik
Nga pangako nga nahisulat sa puting balas
Sa papel-sobreng lapyahan
Sumaysumayon man, sumaysumayon man
Sa mga balod sa nagmultong mga gutlo?
Unsaon ko pagkalot sa atabay sa imong mga
Kandiis?

Niining lawak, niining lawak sa ermitanyo
Naghimo akog dagat sa alak:
Dinhi gipalutaw ang mga paraw
Sa kasaysayan sa usa ka panahon
Sa tingpamulak nga buot kong ipadagsa
Ngadto sa laing kalibotan, sa laing
Kadagatan: Apan, lagi,
Unsaon ko man paghikalimot kanimo, Lara?


--MELQUIADITO M. ALLEGO
Palm Harbor, Florida, USA