ikaupat nga mga awit sa dagat

Nakadungog ka sa mga awit ni Salamia?
Ug nadungog ko ang mga awit sa dagat
Taliwala sa panid sa lapyahan sa kagahapon
Nga gipakli sa mga balod
Didto sa isla sa mga Sama Dilaut
Diin gisukod sa mga hanas nga bolitas
Nga nagpalandong sa akong mga pilok
Ang mga lakang gikan sa garay
Hangtod ngadto sa utlanan
Sa saysay sa sabakan sa yuta
Ug akong nabuhatag pedido ang gilawmon
Sa dakong bato nga nagbansiwag
Sa pangpang sa kahiladman
Nga maoy uyok sa naglilo sa ilang kusog panalipod
Ug nabati ko ang pinitik sa kahiladman
Nga giduyan sa mga balod
Nga nikilab sa parat nga likido
Diin naglutaw ang panagway sa patay nga bulan ug mga bitoon
Nga sa kalit lang gibuak sa nagbaga nga suliyaw
Ug nahigmata ako
Ug akong nadungog ang mga katawa sa mga bata
Nga nakigduwa-duwa sa mga balod didto sa lapyahan
Wala ako makadungog sa mga awit ni Salamia
Apan nakadungog ako sa mga bakho sa mga balod
Nga naghubit sa iyang tanghaga.


-- LEO BOB FLORES
Bukit Batok, Singapore