kadtong mga adlaw sa bulan sa mayo

Pito ka iro nagpadayon sa ilang pagbinugtaway
Niadtong umog nga balas
Sa gihunasang baybayon. Ang mga takna
Sama sa mga baruto’ng gipundohan. Misanglad
Sa mga bato ug mga lusay sa hunasan.
Ilalom sa layog nga kalubihan, ang mga mananagat
Nagpadayon pagyupyop sa ilang mga hunsoy. Mga sahid
Nga wa pa ikataktak kay miundang pa pagpanubad
Ang doot sa mga tulingan. Usa ka tikarol milupad
Ug milupad. Gibugtaw sa panon sa kabataan
Hangtod sa iyang pagkahanaw
Lagbas sa ngilit sa kahaponon.
Naggimaw daw gikan sa bukton sa bughaw’ng habohabo,
Ang daang pantalan mipunting,
Sama sa usa ka bukogong tudlo,
Ngadto sa tinukmaan sa langit ug sa dagat.
Kon mosubay ka sa lapyahan ug imo kining adtoon,
Sugaton ka didto sa mga tinanawan
Sa nanaglingkod nga mga tigulang
Nga daw imong gitugaw sa inadlaw nilang pagbantay
Sa paglabay sa nahibiling mga gutlo sa kahayag.
Kanhi, mao kini ang lumalabayng mga adlaw sa bulan sa Mayo:
Init, tin-aw, lantip, way kibo,
Bisag usahay ang katin-aw daw hipiksan
Og dyutayng pagkahanap, dyutayng pagkalubog.
Way mahulog ngadto sa ibabaw
Sa way balod nga tubig, way mokisaw
Ug maghimog mga lilo.
Ingon nga ang mismo’ng kalibutan
Nahibalo nga kini ang tumang panahon
Aron siya usab mourong, moginhawa’g dyutay
Ug magpabiling usa lang usab ka mananan-aw,
Samtang ang nagsiga’ng adlaw
Didto sa bughawng kalangitan
Mao ray bugtong butang nga naglihok
Sa way paglingi niyang pagpanaw
Padulong sa kasadpan. Nagligid
Sama sa usa ka bulawan’g sensiyo,
Nagligid, sama sa giingon sa usa ka magbabalak,
Ngadto sa naandan niyang lusat
Unya mahulog. Nga di maghimo’g
Bisag dyutay na lang nga paghagtik.

-- URIAS A. ALMAGRO
New Berlin, Wisconsin, USA