oda alang sa akong mga medyas

(hubad sa balak ni Pablo Neruda)

Si Maru Mori midala kanako
og usa ka paresan
sa mga medyas
nga iyang gigansilyo sa kaugalingon
niyang pastoresong mga kamot,
duha ka medyas nga sama kahumok
sa mga koneho.
Akong gidailos ang akong mga tiil
ngadto kanila
ingon nga sila
duha
ka mga kaha
nga ginansilyo
sa hilo sa
kilomkilom
ug sa panit sa mga karnero.
Mangilngig nga mga medyas,
ang akong mga tiil nahimong
duha ka isda
nga hinimo sa lana,
duha ka taas nga mga iho
nga dagatnon sa kaasul
nga gitadlas
sa usa ka bulawanong buhok,
duha ka kinadak-ang itom nga langgam,
duha ka kanyon:
ang akong mga tiil
gipasidunggan sa paagi
ning
mga
langitnong
mga medyas.
Sila
labing matahom
nga sa unang higayon
ang akong mga tiil daw
dili madawat
sama sa duha ka luyahong
bombero, mga bombero
nga dili angayan
sa mga binurda’ng
kalayo
sa nanagsanag
nga mga medyas.

Apan,
akong gisuklan
ang idlot nga tentasyon
pagtipig kanila
ingon nga ang mga batang tinun-an
naghupot
sa mga aninipot,
ingon nga ang mga eskolar
motigom
sa mga sagradong kasulatan,
akong gisuklan
ang ihalas nga pagpugos
sa pagbutang kanila
sa usa ka bulawanong
halwa
ug matag adlaw hatagan sila
og mga kalan-ong liso
ug mga piraso sa rosang pakwan,
sama sa mga mangangaplag
sa kalasangan
nga motugyan sa talagsaon
nga berdeng usa
ngadto sa sugbaanan
ug kan-on nga way pagbasol,
akong gituy-od
ang akong mga tiil
ug gisul-ob
ang
matahom
nga mga medyas
ug
unya ang akong mga sapatos.

Ug ang moral ning akong oda
mao kini:
ang katahom doble nga
katahom
ug ang maayo doble nga maayo
labina kon kini mahitungod sa duha
ka lanang mga medyas
sa panahon sa tingtugnaw.

Gihubad ni:
-- URIAS A. ALMAGRO
New Berlin, Wisconsin, USA