pagbugtaw sa tikarol

Dihang ang usa ka blue jay
Misarap unya mibatog
Niadtong mubo’ng crab apple
Sa luyo kong tugkaran,
Akong nahinumdoman
Kadtong init nga adlaw
Nga, uban sa tirador sa pagkabata,
Akong gibugtaw
Ang usa ka tikarol.
Lagbas sa kalambayongan ug kanipaan,
Labang sa mga tihi ug lapok
Sa nag-agay-ay’ng sapa,
Ginunot ko kadto’ng bughaw’ng langgam
Bisag diin ang iyang gipuntahan.
Hangtod nga kaming duha
Managsamang giabot
Sa labihang kakapoy
Ug kadtong bughaw’ng langgam
Mibatog ug wa na maglihok,
Daw bughaw’ng hilo
Nga gibudbod sa sanga
Sa usa ka lagundi.
Inanay ko siyang gialaw,
Pagduol, pagduol,
Apan sa higayong
Buot ko nang saklawon,
Kalit kadtong milupad
Ngadto sa pagkahanaw
Sa luyo sa layog nga kalubihan.
Karon, ning bugnaw’ng kahaponon
Ning mga adlaw sa tingpangatagak
Giabot ako sa samang tinguha
Pagsaklaw
Ning lain, apan sama kabughaw,
Sama ka nindot, nga langgam.
Apan milabay na,
Milabay na ang panahon
Sa pagpamugtaw ko og mga tikarol.
Maong ako na lang gibantayan
Kining bughaw’ng langgam
Sa iyang pagtusiktusik
Sa gagmay nga mga pula’ng bunga
Nga daw iyang gilaksi sa akong balatian.
Hangtod nga ingon sa may mibugaw,
Kalit kining milupad
Lagbas sa nanag-ilis nga mga bulok
Sa nahibiling kadahonan.

-- URIAS A. ALMAGRO
New Berlin, Wisconsin, USA