paghulat sa mga buhi

Ang nataran sa simbahan alang na usab sa mga patay
bisan na lang sa atong mga damgo

Gikan sa kalsada tataw nga subo ang kahaponon
ang silaw sa adlaw kompas nga natagak sama sa abog
ug ang simbahan layo tan-awon gikan sa atong gipuy-an

Mahimong magpadayon tang namahulay
samtang nagdamgo sa nangagi
bisan tuod kaha dili na kini maanindot sigon sa kadaghanan karon
nagdamgo sa kinabuhi nga naghatod kanato dinhi

Motuig nang gihasol ko sa tinguha nga mobiya sa akong kaugalingon

Apan kining simbahana alang kanato
ug ang naglikop niining tanaman nga nagpangidlap sa kahilom

Ug ang kampanaryo sa kiliran
nga nagpunting sa usa ka bersikulo sa langit nga bisan ang pari
dili makabatbat

Tungod kay kini gitukod sa panahon
nga ang langit ikatanyag lamang sa hagawhaw

Karon ang mga irihis nagpanon nga namidpid
ilang pamiste hayag ug mabulokon

Mapaniiron lang kon diin giandam ta sa bangis nga biaybiay

O kaha mga kaliwat na lang kini sa mga mapatuyangon
kansang mga kalag adlaw ug gabii natong giampoan

Giisa ta ang dunot tang mga kupo
aron salipdan ang katunga sa atong nawong nga ilang makita isip bato
samtang katunga sa atong lawas nahiugbok sa yuta
isip halad sa mga pangindahay nga sarang nilang mabitbit

Makaluluoyng silaw sa adlaw nga nagdupang manggiulawon
kon makasinggit lang unta ko
aron madigwa ko ang kapait sa kamatuoran

Nga hingpit ug way kinutoban ang atong pagkatinamay


-- VICENTE VIVENCIO BANDILLO
Dubai, United Arab Emirates