pasalamat sa pag-agak

(alang kang Pa Dading ug Ma Miling

ug Pa Teo ug Ma Sisay ug Tia Nene)

Ang mansanitas sa kinabuhi inyong giul-og
kanako-- sa dihang kuyabog pa ako.
Gitabyog ug gisangga sa maamomahong am-am
sa sinating mga kamot ug tagokong Palad
ang mga kutayng bagon sa inosente
kong pakighagwa sa Iyang Kahayag.
Ang bola sa kasinatian ming-untol-untol
sa lila ug berde kong agtang
nga nakahimamat sa mga amen sa Orasyon
nga inyong gibagting sa kampanaryo kong
linghod-- Ah, katam-is ug kamahuloganon
ba diay sa kinabuhi diha sa inyong bukton!

Daghan nang mga pangulilang ang akong
napiyong sa mga panid ning Talaadlawan.
Ug ang lanat sa panahon nagtunol
kanakog mga ang-ang padulong sa bantawan
sa kabantog-- Apan, wa ko malimot kaninyo.
Hinoon, taliwala sa kaalingisig sa pakpak
ug kahugot sa lamano sa mga kamot
nga wala ko hiilhi sa akong pagka-ako--
Naghilak king kasingkasing nga buot pakugos
sa inyong pagpangga ug pag-amping;
Nagping-it king kalag sa tumang kamingaw
ug kahidlaw sa inyong mga laylay.

(Wa nay lain pang mga kamot nga nag-umol;
Mga dughan nga mosabot sa akong mga bakho;
Mga altar nga mga bukton nga nag-agak kanako
Padulong sa matul-id nga Dalan sa Kinabuhi!)

-- MELQUIADITO M. ALLEGO
Palm Harbor, Florida, USA