ang dalan paingon sa mantalongon

Mantalongon, bukiran nga mabugnaw
Yamog naa sa kadahonan…
-- awit ni Berting (Eriberto) Montenegro

Di ko na hidunggan pag-usab
Ang lalom nga tingog ni Berting
Ug ang kinablit sa iyang gitara.
Ug ingon man di ko na mabaklay pag-usab
Kadtong naglikolikong dalan
Nga nagpaingon ngadto sa Mantalongon.
Hinoon kanunay’ng magpabilin
Sa mga lapalapa sa akong panumdoman
Kadtong hait nga mga bato
Gikan sa sinugdan hangtod sa katapusan
Ug ang mga gilabyan ko sa masigkadaplin.
Ang luspad nga mga tugas
Nga daw nanampiling,
Ang mga maribuhok nga nanagkalkag
Daw mga ulong nangandoy nga topihan.
Akong mahinumdoman ang ninghubas
Nga busay sa Mag-alambak, ang badlis
Sa kanhi niyang agianan usa ka puti’ng ulat
Sa bukobuko sa abuhong palanas.
Kon ang mga ligid
Sa moadto karong mga sakyanan
Makamao pang mobati,
Ila unta kitang katug-anan
Kon unsa ang ilang gitagamtam
Sa ilang pagtuyok ning dosi kilometros
Sa ilang mga pag-antos.
Daghan nang mga kadalanan
Nga naglikoliko
Sa mga walog ug kapangpangan
Nga akong ning-agian,
Daghan nang mga gapasong kortina
Sa gabon nga akong nalutsan,
Kadaghan na ako hipiksi
Sa yamog sa lain pang mga kadahonan,
Apan sa kanunay magpabilin
Dinhi ning akong panumdoman
Ang handomanan
Niadtong mapig-ot ug naglikolikong dalan
Nga nagpaingon ngadto sa Mantalongon.
Kadtong handomanan sa akong pagtungas.
Kadtong handomanan sa akong pagdulhog.

___________________________________
* Mantalongon: taas nga bukiran sa Dalaguete

nga giila’ng summer capital sa Cebu

-- URIAS A. ALMAGRO

New Berlin, Wisconsin, USA