mahitungod sa mga hulmigas ug mga alasiwsiw

Ang magtutudlo nga kanhi nagsaysay kanako
niadtong sugilanon sa hulmigas ug sa alasiwsiw
dugay nang namatay. Napulo ka libo ka mga milyas
sa pikas tunga ning kalibotan, nia ako karon sa taliwala
ning panahon sa tingtugnaw. Ang way-dahong
mga sanga giyugyog sa ngamig nga kaudtohon
ug nangapulak ang mga tipik sa sihag nga mga yelo.

Sulod sa bildo tang mga bungbong, migunok kita--
daw mga pak-an nga nabalian sa mga kapay
nga gitanggong sa usa ka dakong garapon.

Ang hulmigas nga nagkamang ug nagguyod
niadtong lugas nga mas dako pa kay kaniya
sama sa atong panumdoman sa panahon sa tingtugnaw.
Mabuhi siya uban sa iyang mga hinipos
Sa panas ug nanibuok nga kalibotan.

Apan ang alasiwsiw way hinipos gawas sa mga abo
sa ting-init. Way kasiga nga iyang gisugnoran
human sa iyang pagsilaob. Mao ray iyang natigom
ang mga alukabhang sa lumalabay’ng mga adlaw.

Ang panahon magsublisubli pagpakli
sa mga panid sa ting-init ug tingtugnaw. Siya na karon
ang nagtudlo kanako og lain pang mga leksyon.

-- URIAS A. ALMAGRO
New Berlin, Wisconsin, USA