pagpangahoy

Sayon ang pagtikbas
Ug pagputol,
Bisa’g di ka niini tudloan.
Ang gikinahanglan
Mao ra ang paghatag kanimo’g sundang
Ug ang pahimangno
Paglikay
Nga di ka hitumbahan
Niadtong imong mga gipukan.

Sulod sa kalibonan
Ug kakahoyan
Nahimo kang usa ka gamay’ng emperador
Nga maoy bugtong naghukom
Kon hain sa mga punoan
Ang imong sapsapon
Ug hain ang imong pasagdan.

Unya sa imong paggawas
Gikan sa kapungotan
Ug pagbalik
Niadtong gamay’ng wanang sa kilid,
Gibutang mo sa usa ka pundok
Ang giguyod mong mga punoan

Ug giputolputol, gibugkos
Unya imong gilukdo
Sa imong pagpauli
Subay sa gamay’ng dalandalan
Nga maoy naandan
Mong agianan.

Nahuman na
Ang lain pang adlaw
Sa imong pagpangahoy.
Ang gamay mong dapog
Sa kanunay nagpaabot og sugnod.
Nga human sa ilang pagsilaob
Ug pagdilaab
Magbilin sa naandang abo
Nga imong pophuon
Ug ilabay
Uban sa lain mong mga basura.

-- URIAS A. ALMAGRO
New Berlin, Wisconsin, USA