sa akong adlaw

Human ning usa pa ka lakang,
Mao ray akong naabot
Ang tungatunga
Ning taytayan.
Hapit na mobalik
Ang naglibotlibot nga kilomkilom.
Midungaw ako ngadto sa tubig,
Sa iyang pagdaligdig
Sa mga bato
Sa naandan niyang agianan
Padulong sa dagat.
Ang panaw sa tubig
Dili sukdon
Pinaagi sa mga lakang,
Kay ang tubig nahibalo
Sa iyang tumong.
Samtang ako
Ning akong naabot
Sa mga lakang ning akong panaw,
Wa pa mahibalo
Kon haing tumoya ning taytayan
Ang akong gipadulngan.

-- URIAS A. ALMAGRO
New Berlin, Wisconsin, USA