ang buta'ng makililimos

Dihang akong nabatian
Nga didto sa New York
Ang pagpakilimos
Giisip nga freedom of speech
Nga gipalipdan sa Batakang Balaod,
Akong nahinumdoman
Kadtong buta’ng makililimos
Didto sa dalan sa Colon
Sa dakbayan sa Sugbo.
Matag adlaw tua siya
Niadtong abugong aseras,
Nagkuskos sa iyang gitara
Ug naghuyop sa iyang selendron.
Sa iyang sabakan, ang gibali’ng kalo
Dihay sulod nga pipila ka mga sensiyo.
Mga sukli nga gihulog
Niadtong kadyot nga mga mihunong
Ug kadyot nga mga namimaw.
Kaniadto, dihay nag-ingon
Nga kadtong tawhana
Ug ang daghang mga sama kaniya
Nga tua sa sama’ng mga aseras
Nga nagkatag ning atong kalibotan,
Sa pagkatinuod, wa magpakilimos
Kondili sama lang usab kanato,
Naningkamot, nanginabuhi.
Karon, human sa akong ningdunggan
Mibalik kanako kadtong pangutana
Kon kadtong tawhana nagpakilimos ba
O nagtuman ba lang
Sa kaugalingon niyang katungod
Sa pagpangita.
Apan tingali ning tungora
Kita’ng tanan nasayop
Sa gituhoan tang maoy hinungdan
Niadtong iyang gibuhat matag adlaw.
Kay sa akong paminaw
Ang dako gyud nga tuyo
Niadtong buta’ng makililimos,
Sa matag adlaw niyang pagkuskos,
Sa matag adlaw niyang pagtugtog,
Dili mao ang atong mga sensiyo,
Dili mao ang atong mga sukli,
Kondili ang pagpahibalo kanato
Sa iyang katungod pagsulti
Nga bisag sa makadyot lang unta
Mohapit kita
Ug atong patalinghogan
Kadtong iyang kalibotan
Nga way kahayag.

-- URIAS A. ALMAGRO
New Berlin, Wisconsin, USA