fantaisie impromptu in c-sharp minor (dason sa usa ka hagawhaw)

“Nagtan-aw tang duha
sa bag-ong subang nga bulan,
ikaw lahos sa imong bintana,
ako gikan sa baybayon.”

Giduyogan sa dagatnong huyuhoy
ang tuya sa umog mong higdaanan
ug sa makausa pa ang atong mga anino
nahilis sa kangitngit. Ug sa kangitngit
gikab-ot mo ang bag-ong subang
nga bulan ug nanudlay. Tinuod, adunay
katumanan ang bakho sa damgo
ug pasiatab sa balak. Tinuod, mahimo
na tang mopahulay: kanang asul
nga panganod maoy atong unlan,
ang akong bintana atong habol, ang balas
sa imong lapalapa mga tipaka sa bituon
niining hamubong gabii sa way-
kinutobang baybayon sa imong kasakit.

-- VICENTE VIVENCIO BANDILLO

Dubai, United Arab Emirates