sipyat

Sipyat ang usa ka bulak nga manirado

sa iyang mga gihay inig gabii

kay sa kalibotan sa mga lamian
ang kagabhion baya maoy pagpangabre
sa mga gamingaw nga kasingkasing,
mga dughan nga haw-ang
sa mga bulsa sa karsones,
ang pagkagisi sa mga sidsid
anang mga pang-ilalom,
anang mga tabon-tabon.

Sipyat ang mga bulak
sa ilang pangindahay nga di mahikap
ang mga pungpong sa kalipay.


-- RIC S. BASTASA
Katipunan, Zamboanga del Norte, Philippines