dinhi akong' lihokon

Dinhi akong' lihokon
Sa yuta nga giumol og de kolor
Diin gilumpong sa kinaiyahan
Ang kasadpan ug silangan
Dinhi akong' lihokon ang tanan.

Lihokon ko. Ang unsa? Ang unsa?
Ang tao nga naglingkud ilawom
Sa high-rise sa Louisiana
Nga nagdala og karatola--
“Will work for food”?

O ang ako’ng silingan
Nga kanunay’ng gikulata,
Sa iya’ng hubog nga bana.
Lihokon ko ang tanan, ang unsa?
Ang katilingban? Asa?

Ang mga katawhan
Nga wa gani maka-ila’g silingan?
O ang kapalahubog ni papa?
Dinhi ba? Matarug ba ang bato,
Ang gamot nga migahi sa kalibotan?

Unsa ba? Ang hinungdan

nga nagkuwang sa panapton

ang blusa ug pantalon ni Inday,

ug migisi sa purol ni Dodong?

Dinhi lihokon ko. Apan unsa

ang akong unahon? Ang tahas

nga gisangon ni Lincoln?
O ang gisugo nako ni Papa?

-- BERNARD PAGUSARA
New Orleans, Louisiana, USA