pagpadulong sa amihanan

Going north means going into something deeper than silence.
-- Michael Delp

Nagsultihanay sila bahin sa kamatayon
Ug ako nakahunahuna nga di lang moapil
Ug magpabiling magpakahilom.
Hinoon, bisag giunsa ko pagpaniid
Way pagkurog ang ilang mga tingog–
Ang kahadlok maoy labing lalom
Sa atong mga tinagoan.

Nahibalo ka ba, matod pa sa usa,
Bahin niadtong babaye’ng tigulang nga Eskimo?
Tinuod, nga ang tanan
Dunay pagka-amgo bahin sa kamatayon.
Maong di na tingali kinahanglan pa
Ang mga pagpanamilit.
Kay kita sayod man kon diin
Ang atong mga gipadulngan.

Alang niadtong Eskimo’ng tigulang
Ang tanan sama lang kayano
Sa hilom nga pagtindog
Gikan sa siya nga iyang gilingkoran,
Pagbiya sa gitahi niyang sinina,
Unya pagtikang gawas sa pultahan
Padulong ngadto sa amihanan:
Diin ang tumang katugnaw
Sama ang kabangis, sama ang kaluoy.

-- URIAS A. ALMAGRO
New Berlin, Wisconsin, USA