mirasol

Usa ka daklit nga tinan-awan.
Usa ka bulalakaw nga mitabas sa kadulom
Sa wanang sa akong dughan.

Mga tam-is nga pahiyom.
Mga dagom nga miborda og mga bulak
Sa haw-ang nga panapton
Sa akong handurawan.

Bidlisiw gikan sa malulot nga mga mata.
Ug sa giyamogang kabuntagon,
Nahimo akong usa ka mirasol
Niadtong nawong nga maoy sin-ag nga adlaw
Nga di lung-an sa akong pagtan-aw.

-- URIAS A. ALMAGRO
New Berlin, Wisconsin, USA