agosto veinte uno

Udto kadto,
Dominggo sa laing kamingaw
Sa tibuok isla dihang ikaw
Natumba nunot sa gipalanog
Nga pulbora

Ug naglibotlibot ang aso
Sa akong alimpulo duyog
Sa dag-om nga mihaklap
Ning yuta kong natawhan lakip
Sa adlaw, bituon, bulan.

Apan sa imong pagkasukamod
Gibuhian sa imong kamot ang balod
Nga nikamang, naghaguros
Ug sa wala magdugay

Nabanlas diin natisok
Ang usa ka liso nga hangtod karon
Wala pa gyud moturok dinhi
Sa isla diin ang mga saag
Nga balili mao ra’y nilipang
Ug nikatay sa nagkagidlay
Nga mga lubnganan.


-- MARIA VICTORIA BELTRAN
Cebu City, Philippines