natalimad-an mo ba?

ug nahimong samin
ang imong mga pulong
naaninaw ikaw
sa mga silaba nga nisilab
sa akong galamhan sama
sa akong nakita nga hulagway
atubangan sa kahayag
sa mga sagbot ug kahoy
nga atong gidaoban
gikan gaduslitanay
ang duha ta ka pus-on
ug gaduladula
ang atong mga dila
niadtong gabhiona

ambot kon natalimad-an mo ba
nga wala ang bulan ug mga bitoon
morag nahisama sila
sa mga anino nga nagpahipi lang
sa baga kaayong mga dahon
sa punoan sa mga kahoy
didto daplin sa gadan-ag nga
mga balas sa baybayon


-- RIC S. BASTASA
Katipunan, Zamboanga del Norte, Philippines