ang mga dalan sa santa cruz, manila

Morag mga paa sa managhigugmaay
Nga nangitag kinawat-kawat nga higayon
Nagtinandayay ang ilang mga kahinam—
Amihanan lahos sa habagatan ang busina
Sa ilang daghong, diin ang nanggahing kalawasan
Morag kaigang sa taliabot nga ulan.

Apan sa mga adlaw sa tingtugnaw
Magkiyugpos sab diay dinhi
Ang mga binuhiang katawa
Sa kabaret nga gipanag-iya sa
Mga pampam nga kaniadto,
Hilig makig-asoyay
Og mabulokong mga sugilanon
Ilawom sa punoan sa mangga.

Dinhing dapita, ang katawa
Mohiwa sa pikas eskina lagbas
Sa singgit sa namaligyang piniratang
DVD, lagbas sa mga mamaligyaayg
Baratohong karne, lagbas sa mga walhong
Dalan. Lagbas sa daghang mga eskina
Nga way klaro kon unsay tinuod
Nga sinugdanan, unsa usay tinuod
Nga kataposan…


-- OMAR KHALID
Medellin, Cebu, Philippines