tuktok

Pila ba ka nagpitok-pitok nga bitoon
Ang imong gisabwag nianang aping sa langit?
Asa kaha sila paingon kung mapupos na
ang ilang panahon sa kawanangan?

Apan sama nga sayod ka kung pila na
Ka mga bitoon ang nahanaw sa usa lamang
Ka pagpamilok, sayod sab ko nga inihap mo
Ang matag lugas sa nagkanihit nakong buhok.

Sayod sab ako nga inig piyong unya nako
Mokayab ang akong galamhan didto
Lagbas sa kabitoonan, mosuway
Paghilam tuktok sa imong ganghaan,

Maghulat sa imong tingog
Maghulat sa tanang tubag
Sa tanang hubad sa tanghaga
Sa imong puangod.


-- GINA MANTUA-PANES
Cebu City, Philippines