Kon pwede lang untang talian ang bulan,
kaw-itan ko kini'g pisi ug ihikot sa haligi.
Ipaguyod ko ang akong payag sama's kangga sa kabaw,
ug salmotan ko ang bulan sa iyang paglatagaw.
Mohangad ako.
Lili-on ug ngisihan ko siya
gikan sa gamay kong bintana.
Makapamalandong ako.
Tuod, wala ako'y bitoon
apan higala kami sa bulan.
Ipaguyod ko pa ang akong payag
Ug ipaguyod ko usab ang akong kalag
sama sa kanggang sakyanan sa mag-uumang
nangandoy makakaplag og kapahuwayan.
Tultulan ako sa bulan sa iyang tagoanan
sa mga higayong masilawan siya sa adlaw.
Hatagan kaha ko niya og bisan gamayng luna?
Dinhi sa kalibotan dili akoa kining yuta.
Taud-taod ipakita sa bulan ang iyang tulomanon,
ang iyang bag-ong porma.
Monipis, moniwang,
mahisama sa garab!
Garab! Sama ka's garab,
higalang bulan! Hait ug talinis.
Hay! Kon pwede lang untang talian ang bulan.
Apan karon, itugyan ko usa ang akong mga damgo.
Ugma, sa pagmata puniton ko ang garab
ug mosakay sa kangga
Pikpikon ko ang kabaw
aron among gukdon ang bulan!
-- PAUL RANDY P. GUMANAO
Kidapawan City, North Cotabato, Philippines
kuyawa gyod ning bay paul. padayon ta sa pagsuwat!
ReplyDeleteglenn
haha...salamat, glenn. Unang patik pa ni dinhi sa kabisdak. Akong gitestingan ang 2nd draft sa tula. Padayon ta.
ReplyDeletepadayon sa pagpanggarab...
ReplyDeleteway sama ang unang liwat
panganay day lisod
padayon ta!
Salamat, raul. Padayon ta sa pagpanggarab og mga pulong aron mogamag mga balak alang sa kalingkawasan.
ReplyDeletesulat basa sulat
ReplyDeletebasa sulat basa
kakugi kaikag kakugi
kakugi kaikag kakugi
-mananambalak
mahibaw-an daw ug unsa na ang nahitabo sa tawo: ug makta-an na nga makahibalo na mo-balak!
ReplyDeletebinisaya, kalami paminawon.
i find the bulky and heavy karabao a strong image of burden for a flight to the moon! only in poetry!
unta ug naa kay laing mga balak, ma kabasa sab ko, pabasaha pud ko beh!
terraces@walla.com