kandila

Sumala sa mugna ni Van Eyck
nga The Arnolfini Marriage, ang nag-inusara
ug nagsigang kandila mao daw si Bathala, ingon si titser.
Kining kandila duol sa kama sa managtiayon,
naghubit og ikatulong kinabuhi tali nilang duha.

Apan sa adlawng natawhan ni Dodong Mario
ang iwag sa kandila sa iyang cake iyang gipalong.
Ug sa pagkamatay ni Lolo Rosalio, ang mga kandilang
nikuyanap sa sementeryo di daw angay palongon
bisan pa hapit na naupos, ingon si Lola Misyang.


-- CINDY VELASQUEZ
Cebu City, Philippines