kubrador: pagsakay sa maestra sa bus

Sud 'sa, pagdali, ma'am,
aron ang imong uniform di mabasa sa uwan.
Kadaghan ba'g pasahero 'ron.
Bisa'g ari lang ka sa hagdanan
wa mo’y angay kabalak'an.
Kay kining lawas
mora'g si Tarzan.
Bisa'g usa ra ka tiil nakasangit,
ahong kamot maayo paghawid.
Magkaguliyang man sila sa sud,
ug sa gawas,
ug sa tibuok kalibotan,
wa ko’y labot.
Bisa’g ang pahumot uga nga singot,
wa mo’y angay kabalak-an
samtang imo dunggan
ari sa ahong dughan.


-- AMOR TAN SINGCO
Saint Bernard, Leyte, Philippines