sa akong pag-umangkon

Ang imong wait mora'g
pikas sa orange nagbitay
kon usa ra gani ka pan
ang idunol sa imong apohan.

Ang imong linging mata
mobahad nya mahimong linya
kon usa ra ka slice sa cake
ang ihatag sa imong inahan.

Kon ang imong lawas mora na gani'g
wati, nagkisi-kisi,
motak-om dayon ka sa kahilom
sa usa ka putos nga pan.

Sa pagkakaron, pahimos sa tagurha,
tagutlo nga kalipay kay manguhit ra
unya ang panahon nga bisa'g
unsaon nimo'g tyabaw, wa'y laing

madunol kanimo kon di usa ka putos
nga puno sa pagkahaw-ang.


-- JONA BRANZUELA BERING
Tuburan, Cebu, Philippines