pancit

Dugay nang gisirhan
kadtong gamay’ng tindahan
diin adto ako mopalit
og bulad nga nukos ug pasayan.
Ug ang akong suki sa taboan
nga palitanan ko og sibuyas,
repolyo ug ahos
dugay na usab nga mibiya.
Ang miki didto ko palita
sa dakong tindahan sa Intsik.
Ang asohong dapog, ang sug-ang
dugay nang nangahanaw
ug ang daang kalaha
wa ko hisayri kon diin mahipunta.
Apan karon human sa mga katuigan
daw ako pang hitilawan kadtong
pancit nga kanhi maoy akong lutoon
ug ipanihapon sa hilom
nga mga gabii sa akong kabatan-on.

-- URIAS A. ALMAGRO
New Berlin, Wisconsin, USA