tanghaga sa atong mga kamatuoran

i

ang mga kamatuoran
nahisama sa gamayng kamot
sa bata
mibukhad sa napulo ka
mga tudlo

ii

hinumdumi ang paypay
nga naghimo og hangin
ipha kon pila ka pilo inig
ablihan nimo ug pila kon
imong sirad-an

iii

walay paypay nga tupong
ang mga pinilo
sama sa mga tudlo
sa atong mga kamot

iv

sa kataposan ikaw
hiposon ko pagbalik
walay pilo
kumkomon sa palad
nga tago


-- RIC S. BASTASA
Katipunan, Zamboanga del Norte, Philippines