pag-apas ug pakigtupong sa samdan nga mangluluwas

Dayag nga usa ka uwat ang buwan

sa agtang sa banag-banag, ginawnawan

og yamog. Naghangad nako ang hagdan.

Inig naog nako, madan-agan ang mapa

sa akong lapalapa. Matultolan na pod

ang kinasang-an subay sa akong kalapasan

ug kaluwasan. Unya, sa akong pagpauli,

magkamang na pod ko. Apan dili ko

mohilak inig hay-ad nako sa lawak

bisan pa sa hapdos nga witik sa mga dila

sa talidhay, gabitay gikan sa lab-as nakong

mga samad, labihang sinawa sa kapula.

-- MICHAEL U. OBENIETA

Topeka, Kansas, USA