kataposang sulat sa usa ka binilanggo

Gisulat ko kini sa akong pikas 

sa mga rehas.  Gisulat ko samtang

sa laing pikas gisulat ang akong silot.  

Di na ako makagawas pa pag-usab 

ngadto sa kanhi kong kalibotan.  

Hinoon, daw kana maayo, kay

di ko na man mausab pa pagbuhat 

ang sama kong mga kasaypanan. 

Ulahi na alang sa mga pagmahay.  

Di ta gani maingon nga tingali’g 

nahitabo lang nga didto ako sa sayop 

nga dapit, sa sayop nga panahon.

Kon ang tumong sa pagsilot kanako

mao ang pagbawi sa akong kinabuhi

sirbing akong bayad, kana usab dili 

husto.  Kay unsaon man pagbawi 

niadtong wa ko gyod mapanag-iya?  

Kon unta gihatagan pa ako’g higayon

nga ako gyod ang nangunay pagdumala 

sa akong kinabuhi, makaingon unta ako 

nga ako gyod ang tinuod nga tag-iya.

Apan wa ako tugoti niini. Mao’ng 

ang akong kinabuhi dili gyod akoa 

ug di ko ikasubo kon kini bawion. 

Na, hangtod na lang dinhi.  Wa nay 

kinahanglan nga mangayo pa ako 

sa inyong mga pasaylo.

-- URIAS A. ALMAGRO

New Berlin, Wisconsin, USA