tan-awa ang atong litrato

(kang Frank)

Tan-awa ang atong litrato sa Siem Reap

didto sa Ta Phrom:

naglingkod ta sa usa ka dakong gamot

nga miliyok sa lagpad nga mga bato

ug sa mga nangatun-as nga bungbong

sa tunga sa kalasangan.

Ug gikuha sa tour guide ang atong litrato,

nagpahiyom ta ug giagbay mo ang imong bukton sa akong abaga.

Ang bidlisiw sa adlaw mibanda sa atong buhok

ug nagporma’g korona sa atong ulo

ug ang atong mga mata mipunting

ngadto sa halayo, sa halayo, ug

layo pa gyod kaayo,

ngadto sa pipila ka libo ka katuigan

gikan karon.

Kon dili ta molihok sama niining mga bato

ug magpabilin ta sama sa niining hulagway

ug kon ang mga gamot moliyok sa atong mga bitiis

ngadto sa atong hawak, mga kuko ug tumoy sa migilak nga buhok,

ug kon sa pagpanglabay sa panahon

ang lasang moangkon kanato sa iyang paghikalimot

tingali usab, dihang higayona,

makab-ot nato ang pagkawala’y kamatayon.

-- ESTER TAPIA

Kathmandu, Nepal