ang dalan paingon sa kabalaan

Mihilak ka sa mga bukton sa imong inahan

ug nakaamgo ako niadtong tungora

nga angay kong kalimtan ang kaugalingon.

Samtang naminaw ako sa imong mga bakho

nakahukom ako supak sa akong buot

nga buhaton ko kutob sa akong mahimo

unsay makahatag og kaayohan sa tanan

mao nga nakasulti ako, nga wala sa hunahuna,

sa tumang kataranta, Ang pagbuhat sa sayop

sigon sa kinaugalinong paminsar,

bisan tuod ikabulahan sa uban,

maoy tukmang dalan paingon sa kabalaan.

Ang pagdumili pag-angkon sa sayop

usa ka sayop mismo

ug bunga sa garbo.

Nagbarog tupad kanimo,

nanumpa ako

nga himoong sayon ang imong kinabuhi

pinaagi sa pag-angkon sa tanang kahasol

ug ang kanunay kong gituhoang mahitabo

nahitabo gayod:

gibayaw ako sa kahimayaan.

(gikan sa Iningles ni David Ignatow)

-- VICENTE VIVENCIO BANDILLO

Manila, Philippines